Мирис на сулфур водород во виното
Мирис на сулфур водород во виното
Ова мана се манифестира со тоа што вината имаат послаб или посилен мирис на расипано јајце, поради присуството на сулфур водород, кој има многу непријатен мирис и неговото присуство во голема мера го намалува квалитетот на виното.
Најчесто се јавува кај младите вина. Сулфур водородот се формира во текот на алкохолната ферментација од елементарниот сулфур, кој може да дојде во виното преку грозјето, или со неправилна употреба на сулфурните ленти при сулфурирањето на празните вински садови. Се претпоставува дека винскиот квасец со помош на своите ферменти го редуцира елементарниот сулфур до сулфур водород. Исто така, се смета дека може да дојде до редукција и на сулфурниот диоксид во сулфур водород.
Превентивни мерки. Потребно е да се избегнува сулфурирање на грозјето по прошарокот. При сулфурирање на празните садови потребно е да се употребуваат квалитетни азбестни ленти за да не капне на дното од садот недоволно согорен сулфур. Исто така, појавата на ова мана може да се спречи со благовремено преточување на младото вино во присуство на воздух.
Лекување. Отстранувањето на ова мана може да се врши на неколку начини. Ако мирисот на сулфур водород е слабо изразен, доволно е да се изврши преточување на виното во присуство на воздух. Сулфур водород е лесно испарлив. Ако мирисот е посилно изразен, потребно е преточувањето да се изврши во поголемо присуство на воздух.
Ако сулфур водород е силно изразен и нема можност да се острани со преточување, потребно е да се додаде од 5 до 10 грама сулфур диоксид на хектолитар вино, а потоа да се остави неколку дена да дејствува на сулфур водородот. За тоа време настапува оксидоредукција на сулфур водоротот и сулфур диоксидот со издвојување на елементарен сулфур.
За да се отстран создадениот елементарен сулфур и да не дојде до повторно формирање на сулфур водород, потребно е да се изврши филтрирање на виното.
Не треба да се дозволи во виното да остане подолго време ослободен сулфур водород. Во тој случај тој се врзува со алкохолот, при што формира соединенија, што се викаат МЕРКАПТАНИ. Тие се карактеризираат со многу непријатна миризба која многу тешко се отстранува во виното. За тоа е потребно да се следи неговата појава и штом се констатира, треба да се преземаат итни мерки за негово отстранување.
